არ ვიცი, ყველას ჩვენ-ჩვენი პოლიტიკური ორიენტაცია გვაქვს, მაგრამ ერთ რამეზე ალბათ ვთანხმდებით, რომ ძალადობა ყველასთვის მიუღებელია!
გთხოვთ გაეცნოთ ზემოაღნიშნულ პეტიციას და იმ შემთხვევაში თუ ეთანხმებით ხელი მოაწეროთ!


ჩვენ ვართ საქართველოს მოქალაქეები, ვისაც გვამოძრავებს სურვილი შევცვალოთ ჩვენი პოლიტიკური სისტემა ისე, რომ ჩამოვაყალიბოთ თანამედროვე, დემოკრატიული და თავისუფალი ქვეყანა, სადაც უპირველესი ფასეულობა იქნება ადამიანის ღირსება;

ჩვენ გვამოძრავებს საქართველოს ისეთი მომავლის შექმნა, სადაც მიუღებელი იქნება პიროვნული, საზოგადოებრივი თუ სტრუქტურული ძალადობა;

ჩვენ გვამოძრავებს სურვილი თავიდან ავიცილოთ ძალადობა, რომელიც შეიძლება მოყვეს დღევანდელი პოლიტიკური დაპირისპირების გამწვავებას;

ამიტომ მივმართავთ მიხეილ სააკაშვილს და ოპოზიციის თითოეულ ლიდერს:

- ორივე მხარემ აღიაროს ძალადობა, როგორც პოლიტიკური ბრძოლისათვის მიუღებელი იარაღი. ასევე დაგმოს და შეწყვიტოს იმ საშუალებების გამოყენება, რომელიც იწვევს, ნერგავს, აღვივებს ძალადობას ანდა მოუწოდებს მისკენ;

- ორივე მხარემ პასუხისმგებლობა აიღოს პოლიციის თანამშრომლებისა თუ ოპოზიციის მომხრეების მიერ ჩადენილ ძალადობაზე და აღკვეთოს მისი განმეორება; დემონსტრანტებმა გამოიყენონ პროტესტის მხოლოდ მშვიდობიანი მეთოდები და პოლიციამ ხელი აიღოს ძალის უკანონო გამოყენებაზე;

- ორივე მხარე დაემორჩილოს საქართველოს კონსტიტუციას და კანონს;

ამასთანავე, მივმართავთ ევროპის კავშირის წარმომადგენელს საქართველოში პიტერ სემნებს, საქართველოს მეგობარი ქვეყნების ლიდერებს, საქართველოს პატრიარქს მისი ავტორიტეტის გამო, იშუამდგომლონ ორივე მხარესთან, რათა ძალადობის ესკალაციის თავიდან აცილების მიზნით მოხდეს მშვიდობიან პოლიტიკურ ცვლილებებზე დროული შეთანხმება.


პეტიცია შეგიძლიათ იხილოთ აქ: http://www.gopetition.com/online/27566.html